3 Augustus 2026. Weeklikse Manna en Gebedsversoeke.
- missions3
- Aug 1
- 7 min read
3 Augustus 2026.
Liewe Vriende.
"Die ouderlinge wat goed regeer, moet dubbele eer waardig geag word, veral dié wat arbei in woord en leer." {1 Timoteus 5:17}
Ons leef in 'n tyd waar daar toenemend gesê word: "'n Bedienaar/ Pastoor/Sendeling moet 'n sekulêre werk hê, anders is hy lui." Hoewel hierdie stelling vir sommige wys of selfs verantwoordelik mag klink, staan dit in direkte teenstelling met die Woord van God. Die Bybel beoordeel nie bediening volgens wêreldse maatstawwe nie, maar volgens God se roeping en orde.
Die vraag is nie of 'n bedienaar kán werk nie. Baie doen dit uit nood of volgens hulle persoonlike roeping. Die vraag is eerder: Wat leer die Skrif oor voltydse bediening? Die antwoord is duidelik. God noem bediening arbeid en Hy bepaal dat dié wat hulle lewe aan die bediening van die Woord wy, waardig is om deur die gemeente onderhou te word.
1. Die Bybel noem bediening uitdruklik "arbeid"
"Die ouderlinge wat goed regeer, moet dubbele eer waardig geag word, veral dié wat arbei in woord en leer."(1 Timoteus 5:17)
Die Heilige Gees gebruik doelbewus die woord arbei. Om die Woord te bestudeer, te verkondig, gelowiges te leer, te bid, te beraad, siekes te besoek en die kudde van Christus te versorg, is nie ledigheid nie. Dit verg toewyding, voorbereiding, geestelike dissipline en groot verantwoordelikheid. God self noem dit arbeid.
2. God se beginsel: Die werker moet onderhou word
Paulus gaan verder en sê "Jy mag 'n os wat graan dors, nie muilband nie."(1 Timoteus 5:18)
Hier haal hy die Ou Testament aan en pas dit toe op geestelike werkers. Die beginsel is eenvoudig: iemand wat arbei, behoort uit sy arbeid te kan leef. Dit is nie menslike tradisie nie, maar God se instelling.
3. Voltydse bediening vereis volle toewyding
In Handelinge 6 ontstaan daar praktiese behoeftes in die gemeente. Die apostels antwoord:"Dit is nie reg dat ons die woord van God nalaat om die tafels te bedien... maar ons sal volhard in die gebed en die bediening van die woord.”(Handelinge 6:2,4)
Hulle het nie gesê praktiese diens is onbelangrik nie. Hulle het besef dat God hulle primêre roeping die bediening van die Woord en gebed gemaak het. Daarom is ander aangestel om sekere verantwoordelikhede oor te neem, sodat die bediening nie afgeskeep sou word nie.
Wanneer 'n pastoor/sendeling noodgedwonge voltyds elders moet werk om te oorleef, is daar eenvoudig minder tyd vir gebed, voorbereiding, herderskap, dissipelskap en pastorale sorg. Die gemeente verloor uiteindelik ook daaronder.
4. Paulus se tentmakerbediening word dikwels verkeerd verstaan
Baie verwys na Paulus as bewys dat elke bedienaar altyd 'n sekulêre werk behoort te hê. Maar Paulus sê self:"Nie dat ons die reg nie het nie..."(1 Korintiërs 9:12)
Hy bevestig dat hy die volle reg gehad het om deur die gemeente onderhou te word. Hy het soms daarvan afstand gedoen om spesifieke sendingredes, nie omdat dit God se algemene norm vir alle bedienaars was nie. Sy persoonlike opoffering skaf nie die Bybelse beginsel af nie.
5. Jesus bevestig dieselfde waarheid
Toe Jesus sy dissipels uitstuur, sê Hy:"Die arbeider is sy loon werd."(Lukas 10:7)
Jesus noem evangeliewerk arbeid. Hy verklaar dat dié wat in Sy Koninkryk werk, waardig is om ondersteuning te ontvang. Hierdie beginsel kom dus van Christus self.
Wanneer iemand sê: "'n Bedienaar/Sendeling wat nie 'n sekulêre werk het nie, is lui," sê hy onbewustelik drie dinge:
Hy erken nie geestelike arbeid as ware arbeid nie.
Hy ignoreer die duidelike onderrig van die Skrif.
Hy verwerp die orde wat God vir Sy gemeente ingestel het.
Dit beteken nie elke pastoor móét voltyds deur die gemeente onderhou word nie. Omstandighede verskil. Maar dit beteken wel dat 'n voltydse bedienaar/pastoor/sendeling wat sy lewe wy aan gebed, die bediening van die Woord, herderskap, berading, dissipelskap en geestelike sorg, nie lui is nie. Hy doen die werk waarvoor Jesus Christus hom geroep het, en die gemeente behoort hom met vreugde daarin te ondersteun.
Wanneer die gemeente die waarde van geestelike arbeid verstaan, word die evangelie sterker verkondig, gelowiges beter versorg en God se Koninkryk uitgebou. Laat ons daarom diegene eer wat getrou in die Woord arbei en hulle ondersteun soos die Here dit in Sy Woord beveel.
Gebed: Hemelse Vader, gee ons oë om geestelike arbeid te waardeer soos U dit waardeer en harte wat gewillig is om U dienaars met liefde en eer te ondersteun. Laat U Woord altyd ons maatstaf wees, sodat Christus verheerlik kan word en Sy Koninkryk kragtig uitgebou sal word, in Jesus Naam, Amen.
Die Weeklikse Manna en Gebedsversoeke is ook op die internet beskikbaar. BESOEK GERUS die volgende WEBWERF: https://lourensministries.wordpress.com
U kan ook meer details verkry asook vrae vra oor die bediening deur my te whatsapp op: 0834606914
“The first work of the whole Church is to give the Gospel to the whole world.”
“If God wills the evangelization of the world, and you refuse to support missions, then you are opposed to the will of God.”
“The Light that shines the farthest, shines the brightest nearest home.”
Gebedsversoeke om voor die voete van Vader te lê:
Fasiliteit en Toerusting. Bid asseblief vir die volgende basiese toerusting om die opleiding fasiliteit ruimte optimaal te benut as opleiding fasiliteit asook akkomodasie vir besoekers/reisigers: Bid vir tafels en stoele vir opleiding, ‘n Dubbel Bed ,’n Kombuiskas vir die kombuisarea, mikrogolf oond en twee plaat stofie. Die uitstaande bourekening van R18 398 is nog nie vereffen nie, en ons vertrou die Here vir voorsiening om hierdie hoofstuk finaal af te sluit.
Voertuig. Bid asseblief saam met ons vir voorsiening van ‘n bakkie vir die bediening. ‘n Bakkie is noodsaaklik vir die bediening en het ons ‘n groot behoefte aan ‘n goeie dubbel-kajuit bakkie.
Bybels. Ons ondervind ‘n groot tekort aan Bybels, veral ENGELSE BYBELS. Bid asseblief saam vir Bybels in Engels, Chichewa, Tshonga en Portugees.
Afrika-Bediening. Bid vir die Afrika bediening en die onderskeie koordineerders in Zambia, Zimbabwe, Malawi, Tanzania, Uganda, Kenya en Mosambiek. Bid asseblief vir ondersteuners om die Afrika Bediening te ondersteun.
Afrika Uitreike. Uitnodigings is ontvang vir Zimbabwe, Zambia, Mosambiek en Kenya. Ons akkomodasie en kos word voorsien, ons is net verantwoordelik vir ons eie vliegtuig kaartjie. Bid asseblief saam vir Vader se voorsiening hiervoor.
Maand-Einde Verpligtinge.Ons vra asseblief voorbidding vir Deo Volente Sending se maand einde verpligtinge. Bid asseblief dat die Here sal voorsien in elke finansiële behoefte,{Ons Afrika bediening groei en kan nie verder uitbrei sonder fondse nie} en dat Hy mense op die hart sal lê om Deo Volente konstant maandeliks te ondersteun via debietorder – hetsy in die Capitec of ABSA bankrekening. Mag die Here getroue vennote oprig wat hierdie sendingbediening op ‘n volhoubare manier help dra.
IRAN. Bid saam met gevange Iraanse gelowiges soos die 44-jarige Aida Najaflou. Bid dat sy Christus se teenwoordigheid in spesifieke, onmiskenbare oomblikke sal ervaar. Bid saam met ons veldvennote vir eenheid binne die Liggaam van Christus in Iran, dat verdeeldheid nie wortel sal skiet te midde van enige chaos of verwarring wat deur oorlog of enige ander eksterne omstandighede veroorsaak word nie. Bid vir die gelowiges in Iran. Mag die Here hulle bewaar en hulle help om standvastig in hulle geloof te bly te midde van uitdagende omstandighede.'n Iraanse Christen het hierdie gebed gedeel. Bid vandag saam met hom: “Vader, ons bid dat baie mense in Iran en regoor die Midde-Ooste hulle tot Christus sal wend en in Hom die ware fondament sal vind.” Moussa*, een van ons vennote, berig dat die regering die arrestasies verskerp het. “Ons moet aanhou om ernstig vir hulle beskerming en veiligheid te bid,” sê hy. Iran se intelligensiediens het teksboodskappe aan mense gestuur waarin hulle gewaarsku word dat hul sosiale media-aktiwiteit gemonitor word. Bid dat ons familie met wysheid sal wandel.
MEXICO. Bid dat gelowiges wat in vergetelheid gely het, dié wat deur georganiseerde misdaad geïntimideer is, deur hulle families verwerp is, of gedwing is om hulle geloof in die geheim te beoefen, sal weet dat hulle nie vergeet is nie. Ricardo* was 'n koffieboer in Chiapas. Toe geweld hom egter gedwing het om te vlug, het hy alles verloor. Open Doors het 'n naaimasjien en opleiding aan hom voorsien. Prys die Here dat Ricardo nou 'n klein kleremaakonderneming het. Ons veldspan vra: “Bid dat die wêreldwye Kerk vir die vervolgde Kerk in Mexiko sal opstaan, namens hulle sal praat, hulle stemme sal versterk, en saam met hulle sal staan deur gebed én daadwerklike optrede.” Bid saam met Lía*, wat gedwing is om uit haar huis en klein winkel in Chiapas te vlug nadat sy geweier het om by 'n karteloorlog aan te sluit. Vandag, danksy julle ondersteuning, kon Lía nog 'n winkel koop. Sy vra dat ons sal bid vir dié wat sy agtergelaat het: “Bid dat hulle God sal leer ken en dat Hy hulle teen alle kwaad sal beskerm.”
Gebedsversoeke gebruik uit geopende deure en Jerigo Mure,
Groete in Jesus Christus.
‘n Wonderlike Geseënde Week vir elkeen.
Johan Lourens.
“I would rather teach one man or woman to pray than ten men to preach!” Charles Spurgeon
Baie, baie dankie vir elkeen wat Bid vir ons. Baie. Baie dankie vir elkeen wat ons en die bediening ondersteun. Julle is vennote en het 'n aandeel in elke siel wat gered word vir die Koninkryk
N.S. Druk gerus asseblief hierdie Manna uit en plaas op u gemeente se kennisgewingbord.
Ministry Projects and Services.
Daily Intersession and Prayer. https://missions3.wixsite.com/gennesaret-ministry
Internet counseling and coaching. https://missions3.wixsite.com/gennesaret-ministry
Weekly Devotions, https://lourensministries.wordpress.com & https://missions3.wixsite.com/gennesaret-ministry/blog
National Director for Change a Nation. https://missions3.wixsite.com/gennesaret-ministry
Prophetic Ministry. https://missions3.wixsite.com/gennesaret-ministry
Marriage Preparation. https://missions3.wixsite.com/gennesaret-ministry
Leadership training-Africa Countries.{Malawi, Kenya, Zambia & Mozambique} https://missions3.wixsite.com/gennesaret-ministry
Comments