5 Oktober 2026. Weeklikse Manna en Gebedsversoeke
5 Oktober 2026
Liewe Vriende.
“Maar Jesus het hulle aangekyk en vir hulle gesê: By mense is dit onmoontlik, maar by God is alle dinge moontlik.” {Matteus 19:26}
AS DIT ONMOONTLIK LYK, IS GOD NOG STEEDS GOD
Ons leef in tye waarin baie dinge vir ons menslik gesproke onmoontlik lyk. Ons kyk na die wêreld rondom ons en sien onsekerheid, swaarkry, finansiële druk, siekte, verdeeldheid, oorlog en mense wat hoop verloor. Soms kyk ons ook na ons eie omstandighede en wonder: “Here, hoe gaan ons hierdeur kom?”
Maar Jesus herinner ons aan iets wat ons nooit mag vergeet nie: Wat vir mense onmoontlik is, is nie vir God onmoontlik nie.
Ons hoef nie vandag al die antwoorde te hê nie. Ons hoef nie te weet hoe God elke deur gaan oopmaak nie. Ons hoef net te weet Wie God is.
Deo Volente Sending is hiervan ’n lewende getuienis. Die Here dra ons al 26 jaar as geloofsendelinge. Vir 26 jaar leef ond met die wete dat ons afhanklik is van God se voorsiening, God se genade en God se getrouheid. Daar was tye wat mense gesê het: “Dit is onmoontlik.” Daar was tye wat die pad onseker gelyk het. Daar was tye wat ons self nie geweet het hoe alles sou uitwerk nie.
Maar vandag, 26 jaar later, kan ons terugkyk en sê:
Wat mense onmoontlik genoem het, het God moontlik gemaak.
Nie omdat ons sterk genoeg was nie. Nie omdat ons altyd alles reg gedoen het nie. Nie omdat daar altyd genoeg geld, geleenthede of menslike oplossings was nie. Maar omdat God getrou is.
Elke dag wat Hy ons gedra het, was ’n herinnering: “Ek is nog hier.”Elke deur wat oopgegaan het, was ’n herinnering: “Ek het voorsien.”Elke keer toe ons gedink het ons kan nie verder nie, het Hy ons krag gegee vir nog ’n tree.
Miskien is daar iemand wat vandag hierdie woorde lees en dink:
“My situasie is onmoontlik.”
Miskien is dit jou finansies.
Miskien is dit jou huwelik of gesin.
Miskien is dit ’n droom wat lankal doodgeloop het.
Miskien wag jy al lank vir ’n antwoord van die Here.
Miskien het jy selfs begin glo dat daar geen uitkoms meer is nie.
Moenie God meet aan die grootte van jou probleem nie. Meet jou probleem aan die grootheid van jou God.
Die Here vra nie van jou om die hele pad vooruit te sien nie. Hy vra jou om Hom te vertrou vir die volgende tree.
Geloof beteken nie dat ons weet hoe alles gaan uitwerk nie. Geloof beteken dat ons weet Wie saam met ons op die pad is.
As God vir 26 jaar kon sorg, voorsien en deure oopmaak waar mense gesê het dit is onmoontlik, kan Hy dit ook in jou lewe doen. Jou omstandighede is nie groter as Sy vermoë nie. Jou gebrek is nie groter as Sy voorsiening nie. Jou onsekerheid is nie groter as Sy trou nie.
Daarom, geliefde vriend, moenie moed verloor nie. Hou aan bid. Hou aan glo. Hou aan vertrou. Hou aan om die Here te dien. Wanneer jy nie die uitkoms kan sien nie, kyk na Jesus. Wanneer die pad donker word, hou vas aan Sy Woord. Wanneer mense sê: “Dit kan nie gebeur nie,” onthou wat Jesus gesê het:
“By mense is dit onmoontlik, maar by God is alle dinge moontlik.”
Ons weet nie wat die volgende 26 jaar sal bring nie. Maar ons weet Wie die volgende 26 jaar in Sy hand hou.
Gebed: Here, dankie dat U die God is vir Wie niks onmoontlik is nie. Dankie dat U ons dra wanneer ons swak is, voorsien wanneer ons gebrek het, hoop gee wanneer ons moedeloos is en ’n pad maak waar ons geen pad kan sien nie. Dankie vir U getrouheid oor 26 jaar van Deo Volente Sending en vir elke persoon wat U op hierdie geloofspad gedra het. Help ons om nie deur ons omstandighede oorweldig te word nie, maar om ons oë op U te hou. Gee ons geloof wanneer ons twyfel, moed wanneer ons bang is en volharding wanneer die pad lank raak. Seën elke mens wat vandag swaarkry en laat hulle diep in hulle hart weet: hulle is nie alleen nie. U is steeds God, U is steeds in beheer, en wat vir mense onmoontlik is, is vir U moontlik. In die Naam van Jesus Christus bid ons dit. Amen.
Die Weeklikse Manna en Gebedsversoeke is ook op die internet beskikbaar. BESOEK GERUS die volgende WEBWERF: https://lourensministries.wordpress.com
U kan ook meer details verkry asook vrae vra oor die bediening deur my te whatsapp op: 0834606914
“The first work of the whole Church is to give the Gospel to the whole world.”
“If God wills the evangelization of the world, and you refuse to support missions, then you are opposed to the will of God.”
“The Light that shines the farthest, shines the brightest nearest home.”
Gebedsversoeke om voor die voete van Vader te lê:
Dit is oor ‘n maand op 4 November die volgende munisipale verkiesings: Bid dat God wysheid en onderskeidingsvermoë aan alle kiesers sal gee om verantwoordelik te stem.
Bid dat God eerlike, bekwame en diensbare leiers na vore sal bring. Bid vir vreedsame en regverdige munisipale verkiesings sonder intimidasie, geweld of korrupsie. Bid dat verkiesingsbeamptes onpartydig, eerlik en noukeurig sal optree. Bid dat die verkose munisipale leiers die gemeenskappe se belange bo persoonlike voordeel sal stel.
Bid vir goeie dienslewering, verantwoordelike bestuur en die ontwikkeling van plaaslike gemeenskappe. Bid dat God eenheid, vrede en respek onder Suid-Afrikaners sal bevorder, ongeag politieke verskille.
Maand-Einde Verpligtinge. Ons vra asseblief voorbidding vir Deo Volente Sending se maand einde verpligtinge. Bid asseblief dat die Here sal voorsien in elke finansiële behoefte,{Ons Afrika bediening groei en kan nie verder uitbrei sonder fondse nie} en dat Hy mense op die hart sal lê om Deo Volente konstant maandeliks te ondersteun via debietorder. Mag die Here getroue vennote oprig wat hierdie sendingbediening op ‘n volhoubare manier help dra.groei.
Fasiliteit en Toerusting. Bid asseblief vir die volgende basiese toerusting om die opleiding fasiliteit ruimte optimaal te benut as opleiding fasiliteit asook akkomodasie vir besoekers/reisigers: Bid vir tafels en stoele vir opleiding, ‘n Dubbel Bed ,’n Kombuiskas vir die kombuisarea, mikrogolf oond en twee plaat stofie. Die uitstaande bourekening van R18 398 is nog nie vereffen nie, en ons vertrou die Here vir voorsiening om hierdie hoofstuk finaal af te sluit.
Voertuig. Bid asseblief saam met ons vir voorsiening van ‘n bakkie vir die bediening. ‘n Bakkie is noodsaaklik vir die bediening en het ons ‘n groot behoefte aan ‘n goeie dubbel-kajuit bakkie.
Bybels. Ons ondervind ‘n groot tekort aan Bybels, veral ENGELSE BYBELS. Bid asseblief saam vir Bybels in Engels, Chichewa, Tshonga en Portugees.
Afrika-Bediening. Bid vir die Afrika bediening en die onderskeie koordineerders in Zambia, Zimbabwe, Malawi, Tanzania, Uganda, Kenya en Mosambiek. Bid asseblief vir ondersteuners om die Afrika Bediening te ondersteun.
Afrika Uitreike. Uitnodigings is ontvang vir Zimbabwe, Zambia, Mosambiek en Kenya. Ons akkomodasie en kos word voorsien, ons is net verantwoordelik vir ons eie vliegtuig kaartjie. Bid asseblief saam vir Vader se voorsiening hiervoor.
LAOS. Bid vir moed en voorsiening vir 30 gelowige stryders. Toe hul gemeenskap hulle onder druk geplaas het om hul geloof te verloën, was hulle die enigste Christene wat standvastig gebly het. Bid vir beskerming oor verskeie komende opleidingsessies wat deur Open Doors se plaaslike vennote aangebied word. Bid vir gelowiges terwyl hulle leer hoe om getrou aan God te leef te midde van gemeenskappe wat nie in Hom glo nie. Bid saam met bedieningsleiers wat deur plaaslike owerhede ondervra word. Vra God om aan hulle helderheid en onderskeidingsvermoë te gee wanneer hulle antwoord. Bid vir 40 jong gelowiges wat steeds getraumatiseerd is nadat hul Christelike kamp deur owerhede onderbreek is. Bid dat God hulle vrees sal verander in veerkragtigheid.
KUBA. Hierdie week, onthou Pastoor Silvio* wat uitroep om gebed vir sy land: “Ons smeek God om genade,” sê hy. “En ons vra julle om ons in julle gebede te onthou.” Bid vir ’n kerk in Kuba wat dit wat min hulle het, met diegene wat die grootste nood het, deel. Leiers vra ons om te bid dat hulle “sal aanhou om ’n seën vir ander te wees, ten spyte van die druk wat hulle ervaar”. Prys God vandag saam met Pastoor Abdiel*. Hy dien in ’n afgeleë bergagtige gebied waar gemeenskappe wyd verspreid is. Julle ondersteuning het ’n motorfiets voorsien, wat hom in staat stel om verskeie kerke te bedien. Baie dankie! Pastoor Sairo* wil hê jy moet weet dat God steeds aan die werk is, selfs te midde van verwoesting. “Ons vertrou op God se beloftes,” verklaar hy. Bid vandag vir hom.
MYANMAR. Hierdie maand is die Boeddhistiese fees van Thadingyut (Fees van Ligte). Dit is ook ’n tyd wanneer druk op gelowiges uit Boeddhistiese agtergronde toeneem. Vra God om hulle gedurende hierdie moeilike tyd te beskerm. Bid vir vrede in Myanmar. Bid dat Christene instrumente sal wees wat God kan gebruik om Sy mense, wat met trauma worstel, te herstel en te genees. Hierdie maand sal gelowiges in Myanmar deelneem aan komende opleidingsessies oor hoe om voorbereid te wees op vervolging. Bid vandag vir beskerming oor hierdie byeenkomste.
RUSLAND EN OEKRAÏNE “Die een nasie sal nie meer die swaard teen die ander opneem nie, en hulle sal nie meer leer om oorlog te maak nie.” (Jesaja 2:4). Bid dat die Here aan Russiese en Oekraïense leiers wysheid, nederigheid en moed sal gee om regverdige vrede na te streef, lewens te beskerm en die weg na versoening oop te maak. Vra die Heilige Gees om onverskilligheid, vooroordeel en onvergewensgesindheid uit ons harte te verwyder en ons met Jesus se deernis te vul. Bid vir geestelike ontwaking, ’n moedige Kerk en dat menigtes regoor Rusland en Oekraïne Jesus sal ontmoet.
IRAN EN DIE WYER MIDDE-OOSTE. “Die oorloë oor die hele aarde laat Hy ophou.” (Psalm 46:9). Bid dat die Here aan leiers in Iran, Israel, die Verenigde State en die wyer streek onderskeidingsvermoë en selfbeheersing sal gee om lewens te beskerm, verdere eskalasie te voorkom en vrede na te streef. Vra Jesus om onverdraagsaamheid, vyandigheid en vrees uit ons harte te verwyder en ons te leer om mense deur Sy oë te sien. Bid dat gelowiges Christus se liefde met vrymoedigheid sal uitleef en dat harte regoor die Midde-Ooste na Jesus, die Vredevors, sal draai.
SOEDAN. “Want waar daar naywer en selfsug is, kom daar wanorde en allerhande gemene dade.” (Jakobus 3:16). Bid dat die Here Soedan se leiers na deernis, geregtigheid en vrede sal lei, sodat hulle dialoog en die welstand van hul mense bo persoonlike ambisie sal kies. Vra die Heilige Gees om ons te ondersoek oor hoe ons ons invloed en hulpbronne as rentmeesters bestuur, sodat alles wat Hy aan ons toevertrou, Jesus sal eer. Bid dat gelowiges standvastig sal bly, dat gemeentes plekke van toevlug en versoening sal word en dat die Heilige Gees harte regoor Soedan sal wakker maak vir die reddende hoop wat daar in Jesus is.
LIBANON EN ISRAEL. “Geseënd is die vredemakers, want hulle sal kinders van God genoem word.” (Matteus 5:9). Bid dat die Here aan leiers in Libanon en Israel wysheid, onderskeidingsvermoë en moed sal gee om burgerlikes te beskerm, geregtigheid na te streef en die weg na versoening en vrede oop te maak. Vra Jesus om partydigheid, vyandigheid en selektiewe deernis in ons bloot te lê en ons te leer om elke mens wat deur oorlog geraak word, lief te hê en vir hulle in te tree. Bid dat die Kerk Christus se versoening te midde van diep verdeeldheid sal uitleef en dat die Heilige Gees mense regoor Libanon en Israel na Jesus sal trek.
MIANMAR. “God is vir ons ’n toevlug en ’n beskerming; Hy was nog altyd bereid om te help in nood.” (Psalm 46:2). Bid dat die Here leiers sal oprig wat menselewens waardeer en geregtigheid, versoening en ’n weg na blywende vrede sal nastreef. Vra die Heilige Gees om ons uit onverskilligheid wakker te skud en ons te leer om ons gebede, hulpbronne en invloed getrou te bestuur. Bid dat gelowiges standvastig en Geesvervuld sal bly, dat die Evangelie ondanks teenstand sal versprei en dat gemeenskappe regoor Mianmar redding en blywende hoop in Jesus sal vind.
DEMOKRATIESE REPUBLIEK VAN DIE KONGO (DRK). “Bly weg van die kwaad af en doen wat goed is, soek vrede en jaag dit na!” (Psalm 34:15). Bid dat die Here aan nasionale en streeksleiers ’n sterk oortuiging van wat reg is, verantwoordbaarheid en vasberadenheid sal gee om korrupsie en uitbuiting te verwerp en geregtigheid en vrede na te streef. Vra Jesus om ons te ondersoek oor hoe ons ons besittings, geleenthede en invloed bestuur en om vir ons vrygewige harte vir Sy Koninkryk te gee. Vra die Heilige Gees om ’n geslag op te rig wat in Christus gewortel is, lewens deur die Evangelie verander en herlewing regoor die DRK bring.m
SOMALIË. “Moet jou nie deur die kwaad laat oorwin nie, maar oorwin die kwaad deur die goeie.” (Romeine 12:21). Bid dat die Here aan Somalië se leiers deernis, onderskeidingsvermoë en volharding sal gee om kwesbare gemeenskappe te beskerm, geregtigheid na te streef en hulle land na stabiliteit en vrede te lei. Vra Jesus om vrees, haat en oordeel uit ons harte te verwyder en ons met Sy deernis te vul vir dié wat in geweld vasgevang is. Bid dat Somaliese gelowiges standvastig sal bly, dat Jesus mense sal bevry en verlos en dat geestelike ontwaking regoor Somalië sal plaasvind.
Gebedsversoeke gebruik uit Geopende Deure en Jerigo Mure
Groete in Jesus Christus.
‘n Wonderlike Geseënde Week vir elkeen.
Johan Lourens.
“I would rather teach one man or woman to pray than ten men to preach!” Charles Spurgeon
Baie, baie dankie vir elkeen wat Bid vir ons. Baie. Baie dankie vir elkeen wat ons en die bediening ondersteun. Julle is vennote en het 'n aandeel in elke siel wat gered word vir die Koninkryk
N.S. Druk gerus asseblief hierdie Manna uit en plaas op u gemeente se kennisgewingbord.
Ministry Projects and Services.
Daily Intersession and Prayer. https://missions3.wixsite.com/gennesaret-ministry
Internet counseling and coaching. https://missions3.wixsite.com/gennesaret-ministry
Weekly Devotions, https://lourensministries.wordpress.com & https://missions3.wixsite.com/gennesaret-ministry/blog
National Director for Change a Nation. https://missions3.wixsite.com/gennesaret-ministry
Prophetic Ministry. https://missions3.wixsite.com/gennesaret-ministry
Marriage Preparation. https://missions3.wixsite.com/gennesaret-ministry
Leadership training-Africa Countries.{Malawi, Kenya, Zambia & Mozambique} https://missions3.wixsite.com/gennesaret-ministry
Please visit the prayer postbox at: https://missions3.wixsite.com/gennesaret-ministry
E-Mail:lourensministries@mail.com
P.O.Box 100
De Villiers Street.
Winburg. 9420. Free State.
Cell: 083 4606 914.
For quick support of the ministry for as little as R50 please click on the following link for an online donation. Just R50.
or
“The gospel is only good news if it gets there in time.”(Carl F.H. Henry)
You can also deposit donations via Capitec Cellphone Banking just use Cell Number: 0618163516.
Bank Accounts Ministry and Ministry Team:
Capitec Bank, Branch: 470010, Account: 153 718 3077.{Sending/Mission}
Help to expand God's Kingdom by making an voluntary donation!
Give, and it will be given to you; good measure, crushed down, full and running over, they will give to you. For in the same measure as you give, it will be given to you again. (Luke 6:38)
Giving is not just about making a donation. It is about making a difference
Comments