top of page
Search

7 Julie 2025. Weeklikse Manna en Gebedsversoeke.

  • Writer: missions3
    missions3
  • 3 days ago
  • 10 min read
Deo Volente Mission
Deo Volente Mission

7 Julie 2025


Liewe Vriende.


“As ek dink: My voet wankel — dan ondersteun u goedertierenheid my, o HERE!” {Psalm 94:18}


Ons leef in tye van groot onsekerheid. Oorlog en geweld, ekonomiese druk, morele verval, en die konstante spanning van daaglikse verantwoordelikhede laat baie van ons voel asof ons voete wankel. Jy kyk om jou en vra dalk: “Waarheen is die wêreld oppad? Hoe lank nog moet ek volhou? Hoekom voel ek so alleen in hierdie stryd?”


Maar hoor weer hierdie woorde uit Psalm 94: “As ek dink: My voet wankel — dan ondersteun u goedertierenheid my, o HERE!”


Wat ’n kosbare waarheid! Die psalmis erken dat daar oomblikke is waar ons voete wankel. Hy maak geen geheim van sy stryd of twyfel nie. Maar hy erken ook ’n groter werklikheid — God se goedertierenheid, Sy troue liefde, dra ons deur.

Ons krag lê nie in ons vermoë om altyd vas te staan nie, maar in die Here se vermoë om ons vas te hou. Selfs wanneer ons struikel, is Sy hand onder ons. Sy genade is nie afhanklik van ons prestasie nie, maar van Sy karakter. En God verander nie. Sy liefde is vas. Sy beloftes staan.


In Romeine 8:38-39 lees ons: “Want ek is versekerd dat geen dood of lewe of engele of owerhede of magte of teenwoordige of toekomstige dinge… ons sal kan skei van die liefde van God wat daar in Christus Jesus is nie.”


Ons word nie opgeroep om in ons eie krag te volhard nie. Ons word opgeroep om in God se krag te rus. Wanneer jy moeg voel, is Hy jou rus. Wanneer jy bang is, is Hy jou skuilplek. Wanneer jy wankel, is Hy jou anker.


Liewe vriend, moenie skaam wees om eerlik te wees oor jou swaarkry nie. God vra nie ’n voorgee van krag nie — Hy verlang na ’n hart wat Hom soek, selfs in sy broosheid.

Laat God se goedertierenheid jou elke dag dra. Wanneer die storms van hierdie wêreld jou probeer oortuig dat alles verlore is, laat die Heilige Gees jou herinner: God het jou nie vergeet nie. Jou voet mag wankel — maar Sy hand sal jou nooit los nie.


Gebed: Hemelse Vader, Dankie dat U goedertierenheid ons dra wanneer ons voete wankel. In hierdie wêreld vol onsekerheid en pyn, is U ons vaste rots. Help ons om nie moed op te gee nie, maar ons oë op U te hou. Vul ons harte met hoop, vrede en vertroue in U getrouheid. In Jesus se Naam bid ons dit, Amen.


Die Weeklikse Manna en Gebedsversoeke is ook op die internet beskikbaar. BESOEK GERUS die volgende WEBWERF: https://lourensministries.wordpress.com


U kan ook meer details verkry asook vrae vra oor die bediening deur my te whatsapp op: 0834606914


“The first work of the whole Church is to give the Gospel to the whole world.” “If God wills the evangelization of the world, and you refuse to support missions, then you are opposed to the will of God.” “The Light that shines the farthest, shines the brightest nearest home.”



Gebedsversoeke om voor die voete van Vader te lê:

Jeugweek
Jeugweek

Ons nooi jou uit om saam met ons te bid omtrent die gevare en uitdagings wat die lewens van ons jeug bedreig.Sit hierdie week tyd opsy om vir 'n gesonde generasie in jou land te bid. Vra die Heilige Gees om kragtig onder die jeug te beweeg om hulle van seer te verlos, hulle wonde te genees en hulle verstand en liggame te beskerm. Vra die Here om hulle te lei om getrou te leef en Hom eer en heerlikheid te bring deur elke woord en daad. Gebedsversoeke 1-7 en foto is ‘n uittreksel uit J E R I G O M U R E I N T E R N A S I O N A L E G E B E D N E T W O R K w w w . j w i p n . c o m


  1. MAANDAG 7 JULIE 2025. DWELMVERSLAWING. Weet julle nie dat julle liggaam deel is van Christus nie?... (1 Korintiërs 6:15). Dwelmmisbruik onder die jeug neem steeds toe, en baie wend hulle tot voorskrifmedisyne, dagga, opioïede of sintetiese stowwe om te ontsnap van emosionele pyn of groepsdruk. Verslawing benadeel nie net die liggaam nie, maar beskadig ook die siel en verhoudings. Vra die Here om die kettings van dwelmverslawing te verbreek en die jeug in jou land uit chemiese slawerny te verlos. Bid vir die genesing van wonde wat hulle dryf om ontsnapping deur dwelmgebruik te soek. Vra die Here om mentors en ondersteuningstelsels in hul lewens te plaas wat hulle na heelheid in Christus kan lei.

  2. DINSDAG 8 JULIE 2025, ALKOHOLISME. Moet julle nie aan drank te buite gaan nie; daarmee gaan losbandigheid gepaard. Nee, laat die Gees julle vervul. (Efesiërs 5:18). Minderjarige drinkery en 'binge' drinkery is wydverspreid en word dikwels in die media uitgelig. Alkoholmisbruik kan lei tot ongelukke, geestesgesondheidskwessies en langtermyn fisiese skade soos lewersiekte. Bid dat die jeug weggetrek sal word van alkoholafhanklikheid na die volheid van die Heilige Gees. Vra die Here om hulle krag te gee om groepsdruk te weerstaan en vreugde in Sy teenwoordigheid te vind. Bid vir die genesing en herstel van gesinne en gemeenskappe wat deur alkoholmisbruik onder jongmense geraak word.

  3. WOENSDAG 9 JULIE 2025, SEKSUEEL OORDRAAGBARE SIEKTES (SOS'E). Julle moet niks met seksuele losbandigheid te doen hê nie… (1 Korintiërs 6:18). Baie jongmense word vandag op 'n vroeë ouderdom aan seksuele aktiwiteit blootgestel sonder om die geestelike, emosionele of fisiese gevolge te verstaan. SOS'e, insluitend MIV/VIGS, neem toe onder adolessente, dikwels as gevolg van onbeskermde seks en gebrek aan opvoeding. Vra die Here om die jeug te beskerm teen die fisiese gevolge van seksuele onsedelikheid, insluitend seksueel oordraagbare siektes. Bid dat die Here reinheid sal herstel vir diegene wat benadeel of mislei is en hulle sal genees. Vra Hom om 'n geslag op te rig wat Sy standaarde van heiligheid en waarheid waardeer en daarvolgens leef.

  4. DONDERDAG1 JULIE 2025, GEESTESGESONDHEIDSVERWANTE FISIESE SKADE. Die Here is naby die gebrokenes, Hy help die moedeloses. (Psalm 34:19). Geestesgesondheidsprobleme manifesteer dikwels fisies deur selfbeskadiging, eetversteurings of selfmoordgedrag. Hierdie fisiese dade weerspieël diep emosionele en geestelike wonde wat gebed,ondersteuning en genesing vereis. Vra die Vader om die jeug te bereik wat gebroke en hopeloos voel en om hul wonde te verbind. Vra die Here om die hand van selfvernietiging te stop en dit te vervang met die hoop op nuwe lewe in Christus. Bid vir die Here om nader te kom aan almal wat gebroke van hart is en genesing te bring aan diegene wat sukkel met geestelike nood.

  5. VRYDAG 11 JULIE 2025, ALGEMENE SIEKTES EN KRONIESE TOESTANDE. Here my God, ek het na U geroep om hulp en U het my gesond gemaak. (Psalm 30:3).Baie jeug sukkel met kroniese fisiese toestande soos asma, tipe 1-diabetes en outo-immuunafwykings. Hierdie toestande kan hul aktiwiteite beperk en hul geestelike en emosionele welstand beïnvloed. Vra die Here vir genesing en krag te gee vir elke jongmens wat aan 'n kroniese siekte ly. Bid dat Hy vir hulle sal voorsien van die mediese sorg, hulpbronne en ondersteuning wat hulle daagliks nodig het. Bid dat hulle aangemoedig sal word om op Hom as hul Geneser en Onderhouer te vertrou.

  6. SATERDAG 12 JULIE 2025, VETSUG EN FISIEKE ONAKTIWITEIT. Of besef julle nie dat julle liggaam 'n tempel van die Heilige Gees is nie?... (1 Korintiërs 6:19-20).Moderne lewenstyle, veral digitale verslawing en 'n swak dieet, het gelei tot toenemende vetsug en onaktiwiteit by die jeug, wat die risiko van hartsiektes, diabetes en geestesgesondheidsuitdagings verhoog. Vra die Vader om 'n begeerte onder die jeug aan te wakker om Hom te eer deur na hulle liggame om te sien. Bid dat gesinne bemagtig sal word om gesonde gewoontes rondom kos en oefening aan te kweek. Vra die Here om jongmense te help om patrone van luiheid te verbreek en hul krag, dissipline en energie te vernuwe.

  7. SONDAG 13 JULIE 2025, GROEPSDRUK LEI TOT RISKANTE FISIESE GEDRAG. As sondaars jou wil verlei, my seun, moenie toegee nie. (Spreuke 1:10). Groepsdruk kan die jeug tot gevaarlike gedrag lei wat die risiko van fisiese skade verhoog. Baie neem deel aan riskante aktiwiteite om aanvaarding te verkry, sonder om die langtermyngevolge te besef. Vra die Here om die jeug onderskeidingsvermoë en moed te gee om "nee" te sê vir vernietigende groepsdruk. Bid dat die Vader hulle sal omring met goddelike vriende wat geregtigheid en veiligheid aanmoedig. Vra Hom om hulle identiteit in Christus te versterk sodat hulle nie goedkeuring soek deur risiko's te neem nie

  8. GEHEIME GELOWIGES. Bid vir deursettingsvermoë vir Irakse gelowiges vanuit ʼn Moslem-agtergrond, soos Yasin* Hy het sy gesin na Jesus gelei, maar sy gemeenskap het hom aangerand en sy huis met brandbomme gegooi weens sy besluit om Islam te verlaat. “Toe ek die Bybel vir die eerste keer gelees het, het ek gehuil oor die pragtige woorde daarin,” sê Yasin. Bid dat die Skrif lewenskragtig sal wees te midde van die isolasie en vervolging van geheime gelowiges. Yasin vra jou om te bid dat God hom die krag sal gee om die Evangelie met soveel mense as moontlik te deel. “Ek hoop dat hulle almal gered sal word. Bita het Jesus by ʼn geheime huiskerk in Iran ontmoet. Sy steek haar Bybel weg en fluister haar gebede in die geheim. Bid vir onwrikbare moed en deursettingsvermoë vir vroue soos Bita. Bid vir kinders wat gedwing word om Moslem-oortuigings te leer – selfs wanneer Islam ne hulle geloof is nie. Hulle moenie net hul daaglikse huiswerk hanteer nie, maar hulle moet ook hul vyandige kultuur navigeer. Midde-Oosterse Christene vertel dikwels vir ons dat Jesus Homself in ʼn droom aan hulle geopenbaar het. Bid dat God meer drome en visioene na Moslems sal bring. Dit is vir pastore in die Midde-Ooste ʼn risiko om met gelowiges vanuit ʼn Moslem-agtergrond te werk. Dank God vir pastore wat hierdie risiko neem. Bid vir pastore wat dit waag om nuwe gelowiges te ontmoet. Toe Somayeh* die eerste keer van Jesus gehoor het in haar geboorteland, Iran, het sy een doel gehad: Om te bewys dat Christenskap nie waar is nie en Islam wel. Maar dit was voordat sy op ʼn vriend se uitnodiging by ʼn plaaslike kerk ingestap het. Vra God om Christene aan te moedig om Moslems uit te nooi om te aanbid. Somayeh het ʼn geheime huiskerk begin wat tot 50 mense gegroei het en ʼn plek van genesing en transformasie geword het. Bid dat God meer gelowiges sal oproep om sy Kerk te laat groei en te bevorder. Somayeh lei nou ʼn aanlyn bediening wat geheime Christene in Iran bedien. Sy woon ook opleidingsessies buite haar geboorteland by wat deur Geopende Deure gereël word. “Die opleiding het my begrip van God se Woord verbeter,” sê sy. Vra God om haar bediening uit te brei. Bid saam met Adam en Dina, ʼn Egiptiese egpaar wat Jesus vanuit Islam gevolg het. Toe Adam se pa hul bekering ontdek het, het hy hul lewens bedreig. Vra God om vir hulle albei genade en moed te gee. Adam het danksy die ondersteuning van ʼn Geopende Deure-vennootkerk ʼn gemotoriseerde vragdriewiel ontvang om ʼn inkomste te verdien, en die egpaar het ʼn veilige blyplek gevind. Bid dat hierdie egpaar in hul geloof sal groei. Bid saam met Salim (5). Toe sy ouers hul Christelike geloof onthul het, het hy van die skool af gekom met kneusplekke en geskeurde klere, geboelie deur sy Moslem-klasmaats. Bid vir kinders wie se geloof hulle in gevaar stel. Bid vir vrede vir Salim se ouers, wat hul seun op aanbeveling van Geopende Deure se plaaslike vennote by ʼn skool ingeskryf het sonder om hul Christelike geloof te noem. “Dit is vir nou die enigste opsie om ons kind te beskerm,” sê Salim se pa. (Name verander vir sekuriteits doeleindes. Gebedsversoek uit Geopende Deure se gebedsgids.)

  9. Kanaal 7-Namibia. Ons vra asseblief vir gebed vir: 'n Geseënde en suksesvolle Radiothon fondsinsamelingsprojek in Julie/Augustus; Vader weet hoeveel fondse hulle benodig. 'n Positiewe gesindheid en betrokkenheid van die gemeenskap. Vrywilligers wat gewillig is om hul tyd en energie aan hierdie projek te wy. Ons wil ook graag versoek dat daar spesifiek vir ons personeel gebid word: vir wysheid, krag en volharding in hul daaglikse take, asook vir geestelike en emosionele versterking.

  10. Bediening-Sentrum Hulp. Bid vir voorsiening om die motorhuis te verander in ‘n bediening sentrum en vir die regte bouers en loodgieters.’n Sending Sentrum is ‘n noodsaaklike hulpmiddel vir ons om ons werk te doen in die gemeenskap en om te dien. Bid dat Vader se voorsiening kom op 'n manier wat ons nie verwag nie, en laat ons die wonder van SY voorsiening ervaar.

  11. Bybels. Ons ondervind ‘n groot tekort aan Bybels, veral ENGELSE BYBELS. Bid asseblief saam vir Bybels in Engels, Chichewa, Tshonga en Portugees. As u kan ‘n Bybel borg vir so min as R100 betaal dit in die Capitec Sending Rekening: 153 718 3077 met verwysing: “BYBELS”.

  12. Afrika-Bediening. Bid vir die Afrika bediening en die onderskeie koordineerders in Zambia, Zimbabwe, Malawi, Tanzania, Uganda, Kenya en Mosambiek. Bid asseblief vir ondersteuners om die Afrika Bediening te ondersteuen. Enige bydrae sal verskriklik waardeer word. Maak die verwysing die land wat u ondersteun.

  13. Winburg Bediening. Bid asseblief vir die bediening op Winburg. Die aanvalle is kwaai met verskeie uitdagings. Mag God Sy hand oor die bediening hou, lewens verander, en die werkers versterk. Bid vir beskerming, voorsiening en leiding, sodat alles tot God se eer sal wees.

  14. Voertuig. Bid asseblief saam met ons vir voorsiening van ‘n bakkie vir die bediening. ‘n Bakkie is noodsaaklik vir die bediening en het ons ‘n groot behoefte aan ‘n goeie bakkie.

  15. MAAND-EINDE VERPLIGTINGE. Bid asseblief saam dat God vir ons permanente ondersteuners sal opwek om die bediening te ondersteun. Sedert die 2020 Covit Epidemie het ons ondersteuning geval met 60% en is dit ‘n groot uitdaging om al die maandeliks verpligtinge na te kom. Maar God is getrou in hierdie geloof pad wat ons stap










Groete in Jesus Christus.

‘n Wonderlike Geseënde Week vir elkeen.

Johan Lourens


 “I would rather teach one man or woman to pray than ten men to preach!”  Charles Spurgeon


Baie, baie dankie vir elkeen wat Bid vir ons. Baie. Baie dankie vir elkeen wat ons en die bediening ondersteun. Julle is vennote en het 'n aandeel in elke siel wat gered word vir die Koninkryk!


N.S. Druk gerus asseblief hierdie Manna uit en plaas op u gemeente se kennisgewingbord.


Ministry Projects and Services.

Please visit the prayer postbox at: https://missions3.wixsite.com/gennesaret-ministry


De Villiers Street.

Winburg. 9420. Free State.

Cell: 083 4606 914.


For quick support of the ministry for as little as R50 please click on the following link for an online donation. Just R50.

or


“The gospel is only good news if it gets there in time.”(Carl F.H. Henry)


You can also deposit donations via Capitec Cellphone Banking just use Cell Number: 0618163516.


Bank Account:

First National Bank:FNB: Branch:250655.Account: 63 0834 99260.


Help to expand God's Kingdom by making an volantary donation!


Give, and it will be given to you; good measure, crushed down, full and running over, they will give to you. For in the same measure as you give, it will be given to you again. (Luke 6:38)


Giving is not just about making a donation. It is about making a difference


 
 
 

Kommentare

Committed to Bringing Glory to His Name
  • Whatsapp
  • Telegram
bottom of page